WORSE AKA BETTER

   സാധാരണ പേനയെടുക്കാറുള്ളത് എന്തിനെയെങ്കിലും കുറിച്ചുള്ള ചിന്തകൾ മനസ്സിനകത്ത് കലങ്ങിമറിയുമ്പോഴാണ്. ഇതാദ്യമായാണ് ഒന്നുമില്ലായ്മയിൽ നിന്ന് എന്തെങ്കിലും നിർമിക്കാൻ പറ്റുമോ എന്നൊരു ശ്രമം. അതുകൊണ്ടുതന്നെ എഴുതുന്ന സമയത്ത് വരുന്ന ചിന്തകൾ തന്നെയായിരിക്കും ഇനി വരാൻ പോകുന്ന വരികളിൽ കാണാൻ കഴിയുക

.

    ശുദ്ധവായു തരക്കേടില്ലാതെ ലഭിക്കുന്ന സ്ഥലത്തുതന്നെയാണ് ഇപ്പോഴും ഞാൻ ഉണർന്നെണീക്കുന്നത് എന്ന് തന്നെയാണ് വിശ്വാസം . എന്നാലും മനസിനിപ്പോ ' ശുദ്ധവായു ' ലഭിക്കുന്നില്ല എന്ന തോന്നലാണ്.

ലോക്ക് ഡൌണിന്റെ പാരമ്യഘട്ടത്തിൽ മനസ്സുമൊത്തം ' ലോക്ക്ഡ് ' ആയതുപോലാണ്. ഇക്കാലത്ത് ;അതായത് കൊറോണക്കാലത്ത് ഒരു മനുഷ്യന് ലഭിക്കാവുന്ന ഭാഗ്യങ്ങളും സൗകര്യങ്ങളും ഏതാണ്ടെല്ലാംതന്നെ ലഭിക്കുന്ന എനിക്ക് മനസുഖം കുറവാണെന്ന് പറയുമ്പോൾ ഞാൻ തന്നെ ബാക്കിയുള്ളവരുടെ അവസ്ഥ ചികഞ്ഞെടുക്കാനുള്ള ശ്രമത്തിലാണ് .

    പത്താം തരം നല്ലരീതിയ്ക്ക് തന്നെ പാസ്സായ അനിയത്തി അടുത്തപടി എന്ന് എപ്പോൾ എങ്ങനെ എന്നാലോച്ചിരിക്കുന്നു. പഠിയ്ക്കേണ്ടുന്ന വിഷയം ഏതാണ്ടുറപ്പിച്ചെങ്കിലും ഓൺലൈൻ ക്ലാസ്സുകൾകൊണ്ട് മാത്രമാവ ഗ്രഹിക്കാനാവില്ല എന്നാണ് തോന്നുന്നത്. ഞാൻ പ്ലസ് വണ്ണിന് ക്ളാസ്സുകളെല്ലാം മുറയ്ക്ക് കിട്ടിയിട്ടും അനുഭവിച്ച ആ ഒരു വിങ്ങൽ ശരിയായിട്ടുള്ള കമ്മ്യൂണിക്കേഷൻ നടക്കുന്നില്ല എന്ന ഞാൻ വിശ്വസിയ്ക്കുന്ന ഓൺലൈൻ ക്ലാസ് ലഭിക്കുന്ന അനിയത്തി എത്രമാത്രം മനസിലാക്കിയെടുക്കുമെന്നറിയില്ല .

    ഞങ്ങൾ കൂട്ടുകാർ ആഗ്രഹിച്ച , വിശ്വസിച്ച തലങ്ങളിലേക്കൊന്നുമെത്തിയില്ലെങ്കിലും ജീവിതസമരം തരക്കേതരക്കേടില്ലാതെ തന്നെ നയിക്കാൻ പാകത്തിനൊരു വരുമാനം ലഭിക്കുന്ന ആ ' റിബലിന്റെ ' മനസിലേക്ക് ഞാനിടയ്ക്ക് ഊളിയിട്ടുനോക്കാറുണ്ടെങ്കിലും ഒരു വിവരശേഖരണം നിലയ്ക്കല്ലാതെ അവിടെ സാന്ത്വനത്തിന്റെ വിത്തുകൾ പോലും പാകാനായിട്ടില്ലിതുവരെ. വീടും നാടും വിട്ട് മറ്റൊരു സ്ഥലത്ത് നിൽക്കുക എന്നത് ഒരു അനുഭവമാണ് എന്നതിൽ തർക്കമൊന്നുമില്ലെങ്കിലും ആഗ്രഹിച്ചാലും വീട്ടിലേക്ക് എത്തിപ്പെടാൻ പറ്റില്ലെന്ന അവസ്ഥ കുറച്ച് കഷ്ടംതന്നെയാണ് . മനസിന്റെ വൈകാരികതലം നോക്കുകയാണെങ്കിൽ ;ഇടയ്ക്കൊന്ന് സമതലത്തിലെത്തിയിരുന്ന കടിഞ്ഞാണില്ലാത്ത കുതിര വീണ്ടും ആവശ്യമുള്ളതോ ഇല്ലാത്തതോ ആയ കയറ്റങ്ങളിൽ വളരെ പരിശ്രമിച്ചുകയറുന്നു എന്ന് തോന്നും അവന്റെ മനസിന്റെ സഞ്ചാരം.

     Social Distancing  ന്റെ ഒരു കരിമ്പടം നേരത്തെതന്നെ പുതച്ച ; ഉള്ളിലൊരുപക്ഷേ കടലോളം സ്നേഹം കൊണ്ടുനടക്കുന്ന സുഹൃത്ത് , അല്ലറ ചില്ലറ വീട്ടുപ്രശ്നങ്ങൾക്ക് മുന്നിൽ ഓൺലൈൻ ക്ലാസും അറ്റൻഡ് ചെയ്തിരിപ്പുണ്ട്. Social Distancing Keep  ചെയ്യുന്ന അയാളുടെ മറ്റു സുഹൃത്തുക്കൾക്ക്  ഈ ' അല്ലറ ചില്ലറ ' പോലും അറിവുണ്ടാവാൻ വഴിയില്ല . എനിക്ക് പക്ഷെ അങ്ങനല്ല!!! ചില ചാനൽചർച്ചകളിലെ നേതാക്കന്മാരുടെ പോലെ അസ്ഥാനത്തു മറുപടി കൊടുക്കാറുണ്ടെങ്കിലും ഇതുവരെ സാമൂഹിക അകലം എനിക്ക് പാലിക്കേണ്ടി വന്നിട്ടില്ല.

     ഇന്ന് ഞാൻ 54 പോസിറ്റീവ് കേസുകൾ ഹാൻഡിൽ ചെയ്തു എന്ന നിർമമമായി ചെന്നൈയിലെ കോവിഡ് ആശുപത്രിയിലിരുന്ന് മറ്റൊരു സുഹൃത്ത് എനിക്ക് ടെക്സ്റ്റ് ചെയ്തു. രണ്ടുമാസം മുന്നേ ആദ്യ കോവിഡ്  പോസിറ്റീവ് കേസ് ഹാൻഡിൽ  ചെയ്തു എന്ന പറഞ്ഞപ്പോഴുണ്ടായ വിറയലും പേടിയും മെസ്സേജിലൂടെത്തന്നെ എനിക്ക് മനസിലായതാണ് .ഇപ്പൊ ഡിപ്പാർട്മെന്റിലെ ഒരു സീനിയറിനു രോഗം ബാധിച്ചു. ആരോഗ്യരംഗത്ത്   പ്രവർത്തിക്കുന്ന ആളായതുകൊണ്ട് വീട്ടിൽ വരുന്ന കാര്യം ചിന്തിക്കേണ്ടതേയില്ല. ആഹാരവും വിശ്രമവും കിട്ടിയാൽ കിട്ടി എന്നുപറയാം.  ഈ ബഹളങ്ങൾക്കിടയിൽ അയാൾ സോഷ്യൽ മീഡിയയിൽ താൻ വരച്ച  ചിത്രം പോസ്റ്റ് ചെയ്തു ! അതും ആരോഗ്യപ്രവർത്തകയായതുകൊണ്ട് ഇറക്കിവിടണമെന്ന് അയല്പക്കത്തുള്ളവർ പറഞ്ഞ  അതേ ഹോസ്റ്റൽ മുറിയിൽ ജോലിയ്ക്കിടയിൽ വല്ലപ്പോഴും കിട്ടുന്ന ഇടവേളകളിൽ വരച്ചത്.

     പുറത്തുപോയി മാത്രം നടത്താൻ പറ്റുന്ന ബിസിനസ്സ് ചെയ്യുന്ന അമ്മാവനും , ലോക്ക് ഡൗണിനൊപ്പം  വീടിനകത്ത് മറ്റൊരു ലോക്ക് കൂടി സഹിക്കേണ്ടിവരുന്ന  പ്രണയിനിയുള്ള  സുഹൃത്തും ,  അമ്മയും അച്ഛനും മറ്റുരണ്ടിടങ്ങളിലായി വരാൻ പറ്റാത്ത സാഹചര്യത്തിലിരിക്കുന്ന മറ്റൊരു സുഹൃത്തും അങ്ങനെ  ആലോചിച്ചപ്പോൾ ഞാനാണ് തമ്മിൽ ഏറ്റവും ഭാഗ്യവാൻ എന്ന ബോധമുണ്ടായി. എനിക്കീയൊരു മനസ്ഥിതിയാണെങ്കിൽ ബാക്കിയുള്ളവർ.....

     സാമൂഹിക  ജീവി  എന്ന നിലയ്ക്ക് പറയാൻ പാടില്ലാത്തതാണ് .. എന്നാലും.  For sometime I thought that my life is Worse. Then I looked into the surroundings. The word WORSE replaced by the word BETTER