വായനക്കാരന്‍റെ നിരീക്ഷണം: അന്നാ കാരെനിന - ലിയോ ടോൾസ്റ്റോയ്

    ഒരു ലക്ഷ്യവുമില്ലാതെ  ലൈബ്രറി പുസ്തകങ്ങൾക്കിടയിൽ പരതിയപ്പോഴാണ് ഒരുപാട് നാൾ മുന്നേ തന്നെ  മനസ്സിൽ പതിഞ്ഞ അന്നാ കരെനിന എന്ന നോവലും ലിയോ ടോൾസ്റ്റോയി എന്ന നോവലിസ്റ്റും കണ്ണിൽ പെട്ടത്. റഷ്യൻ സാഹിത്യചരിത്രം എടുത്താൽ അല്ലെങ്കിൽ ചരിത്രം തന്നെ എടുത്താൽ എക്കാലവും മുൻപന്തിയിൽ തന്നെയുള്ള ഒരു എഴുത്തുകാരനാണ് ലിയോ ടോൾസ്റ്റോയി. അദ്ദേഹത്തിന്റെ ഏറ്റവും വായിക്കപ്പെട്ട പുസ്തകങ്ങളിൽ ഒന്നാണ് അന്നാ കരെനിന. അദ്ദേഹത്തിന്റെ തന്നെ വാക്കുകൾ കടമെടുത്താൽ അദ്ദേഹത്തിന്റെ ആദ്യത്തെ യഥാർത്ഥ നോവലാണിത്. വിശ്വസാഹിത്യത്തിലെ എക്കാലത്തെയും ഏറ്റവും  മികച്ച കൃതികളിലൊന്നായി ഇത് കണക്കാക്കപ്പെടുന്നു.

പുസ്തകത്തിലേക്ക് വന്നാൽ വിവാഹിതയും ഒരു കുട്ടിയുടെ അമ്മയുമായ അന്നായ്ക്ക് ഒരു അന്യ പുരുഷനോട് ഉണ്ടാകുന്ന പ്രണയവും അതിനെ തുടർന്നുണ്ടാകുന്ന സംഭവപരമ്പരകളുമാണ് ഇതിന്റെ പ്രമേയം. എങ്കിലും 1870 കളിലെ  റഷ്യൻ അപ്പർ/മിഡിൽക്ലാസ് കുടുംബങ്ങളിലെ ജീവിതങ്ങൾ നോവലിസ്റ്റ് ഇതിലൂടെ വരച്ചു കാട്ടിയിരിക്കുന്നു. അന്നയെ കൂടാതെ അന്നയുടെ സഹോദരൻ ഒബ്ലോൻസ്കി, ഭാര്യ ഡോളി, അവരുടെ സഹോദരി കിറ്റി, ഭർത്താവാകുന്ന ലെവിൻ, അന്നയുടെ പ്രേമഭാജനമാകുന്ന വ്രോൺസ്‌കി... അങ്ങനെ നീണ്ടു പോകുന്നു ഇതിലെ കഥാപാത്രങ്ങൾ. ഓരോരുത്തർക്കും ഓരോ സ്വഭാവവും ഓരോ ജീവിത രീതിയുമാണ്.

ഇന്ത്യയിൽ നാമിന്ന് കാണുന്നതും  മുമ്പ് ഉണ്ടായിട്ടുള്ളതുമായ  ജീവിതരീതിയിൽ നിന്ന് ഏറെ വ്യത്യസ്തമാണ് നോവലിലെത്.  കുതിരപ്പന്തയത്തിനും ഒരുമിച്ചിരുന്നുള്ള ഡിന്നറിനും ചീട്ടു കളിക്കും  വളരെ വലിയൊരു സ്വാധീനം അവരുടെ ജീവിതത്തിൽ ഉണ്ട്.  അവരുടെ സംസാരശൈലിയും വളരെ വ്യത്യസ്തമാണ്. സ്വന്തം ഭർത്താവിനോടും അച്ഛനമ്മമാരോടും എന്തിന് കാമുകി കാമുകന്മാരോടുപോലും വളരെ ഔപചാരികമായാണ് എല്ലാവരും പെരുമാറുന്നത്. അങ്ങനെ പെരുവമാറാത്തവർ കൂട്ടത്തിൽ ഒറ്റപ്പെട്ടു പോകുന്നു. അന്നത്തെ ഗതാഗത-വാർത്താവിനിമയ രീതികളും നോവലിൽ നിന്ന് മനസ്സിലാക്കാവുന്നതാണ്, അവയ്ക്ക് കഥാഗതിയിൽ വലിയ സ്വാധീനവും ഉണ്ട്.

നോവലിന്റെ  തുടക്കത്തിൽ അന്നാ തന്റെ സഹോദരന്റെ   ശിഥിലമാകാൻ പോകുന്ന കുടുംബം നേരെയാക്കി കൊടുക്കുന്നുണ്ടെങ്കിലും തന്റെ ജീവിതത്തിന്റെ കാര്യം വരുമ്പോൾ കാര്യങ്ങൾ മറ്റൊരുതരത്തിൽ ആകുന്നു. അതി സുന്ദരിയും ബുദ്ധിമതിയും ആയ അന്നായ്ക്ക്  എന്നാൽ ജീവിതത്തിൽ നല്ല അനുഭവങ്ങൾ അല്ല നേരിടേണ്ടി വരുന്നത്. നോവലിന്റെ തുടക്കത്തിൽ താറുമാറായിക്കിടന്ന ബാക്കി എല്ലാവരുടെയും  ജീവിതങ്ങൾ നോവൽ തീരാറാകുമ്പോഴേക്കും ഒരുതരത്തിൽ അല്ലെങ്കിൽ മറ്റൊരു തരത്തിൽ ശുഭസൂചനകളിലേക്ക് നീങ്ങുന്നുണ്ടെങ്കിലും അന്നായുടെ കാര്യത്തിൽ അങ്ങനെയല്ല സംഭവിക്കുന്നത്.

ഒരുപക്ഷേ അന്നാ ഒരു ആണായിരുന്നെങ്കിൽ അവർക്ക് ഇത്രയും  പീഡനങ്ങൾ ഏറ്റുവാങ്ങേണ്ടി വരില്ലായിരുന്നു. പലകാര്യങ്ങളിലും നാം വിചാരിക്കുന്നതിലും അധികം സ്വാതന്ത്ര്യവും പല സന്ദർഭങ്ങളിലും അഭിപ്രായം പറയാനുള്ള സ്വാതന്ത്ര്യവുമെല്ലാം സ്ത്രീകൾക്കുണ്ടെങ്കിലും ഇങ്ങനെ ചില മാമൂൽ പ്രശ്നങ്ങൾ വരുമ്പോൾ അത് കൂടുതൽ ബാധിക്കുന്നത് ബാക്കി എല്ലായിടത്തെയും പോലെ അവിടെയും സ്ത്രീകളെ തന്നെയാണ്. മാനസിക സംഘർഷങ്ങൾ അന്നായുടെ പങ്കാളിയാകുന്ന വ്രോൻസ്‌കിക്കും ഭർത്താവ് കരേനിന്നും ഉണ്ടാകുന്നുണ്ട് എങ്കിലും സൊസൈറ്റിയിലെ ജനങ്ങൾ "തെറ്റ്" എന്ന് വിളിക്കുന്ന ഒരു കാര്യം ചെയ്തിട്ട് അവരുടെ നടുവിലേക്ക് ഇറങ്ങി ചെല്ലാൻ പുരുഷൻമാർക്ക് കഴിയുകയും സ്ത്രീകൾക്ക് കഴിയാതിരിക്കുകയും ചെയ്യുന്ന ഒരു സ്ഥിതിവിശേഷമാണ് നോവലിന്റെ പശ്ചാത്തലത്തിൽ ഉള്ള റഷ്യയിലുള്ളത്. പലയിടത്തും ഇന്നും അത് അങ്ങനെ തന്നെയാണ്.

ഇതുകൂടാതെ നോവലിൽ പൊതുവായികണ്ട മറ്റൊരു കാര്യം മനുഷ്യരുടെ കുഴഞ്ഞുമറിഞ്ഞ ചിന്തകളെ വായനക്കാരിലേക്ക് എത്തിക്കുന്നതാണ്. പല പല മാനസിക സംഘർഷങ്ങളിൽ ഏർപ്പെടുന്ന കഥാപാത്രങ്ങൾ താൻ ഇനി ജീവിക്കണോ, മരിക്കണോ, അതുപോലെ ദൈവം ഉണ്ടോ,  ദൈവത്തെ നാം വിശ്വസിക്കണോ,  ഗ്രാമ ജീവിതമാണോ നഗരജീവിതമാണോ നല്ലത് ... അങ്ങനെ പല രീതിയിലുള്ള സംഘർഷങ്ങൾ എല്ലാ കഥാപാത്രങ്ങൾക്കും ഉണ്ട്. അവരവർക്ക് ചുറ്റുമുള്ള അവരെ സ്നേഹിക്കുന്നവരുമായി ബന്ധപ്പെട്ടാണ് ഇതിനുള്ള ഉത്തരം ഓരോരുത്തരും കണ്ടെത്തുന്നത്.

    1870കളിലെ പൊതുവിലുള്ള റഷ്യൻ ജീവിതം നമുക്ക് മനസ്സിലാക്കിത്തരുന്ന ഈ പുസ്തകം വായിച്ചിരിക്കേണ്ടതുതന്നെയാണ്.