വായനക്കാരന്റെ നിരീക്ഷണം : ദാമിയന്റെ അതിഥികൾ- അരുൺ ആർഷ

    “വിഷയാസക്തനും മോഷ്ടാവും യോദ്ധാവും പീഡിതനും കമിതാവുമല്ലേ ദിവസങ്ങളെ വൈവിധ്യപൂർണ്ണമായി ആസ്വദിക്കുന്നുള്ളൂ, ധനികനും സുവിശേഷകനും വിശ്വാസിയും മാന്യനും വെറുതെ ഉണർന്നിരിക്കുന്നതേയുള്ളൂ... വെറും മരപ്പാവകൾ”.

    പുസ്തക പ്രേമികളായ ഒരു കൂട്ടം ആൾക്കാരുടെ ഓൺലൈൻ പേജിലെ പോസ്റ്റിൽ "നിങ്ങൾ വായിച്ച പുസ്തകങ്ങളിലെ ഏറ്റവും അണ്ടർ റേറ്റഡ് ആയിട്ടുള്ള പുസ്തകം ഏതാണ്" എന്ന ചോദ്യത്തിന് കിട്ടിയ കമന്റുകളിൽ ഏറ്റവും കൂടുതൽ ആൾക്കാർ അഭിപ്രായപ്പെട്ട ഒരു പുസ്തകമാണ് അരുൺ ആർഷ എഴുതിയ ‘ദാമിയന്റെ അതിഥികൾ’. പുസ്തകത്തെയും എഴുത്തുകാരനെയും മുൻപരിചയം ഇല്ലാത്തതിനാൽ യാതൊരു മുൻധാരണയുമില്ലാതെ വായിച്ച പുസ്തകമാണ് ഇത്. എന്നാൽ വായിച്ചു തീർന്നപ്പോൾ പ്രസ്തുത പോസ്റ്റിൽ പറഞ്ഞതുപോലെ തീർച്ചയായും അണ്ടർ റേറ്റഡായിട്ടുള്ള ഒരു പുസ്തകമാണ് ഇത് എന്ന് ബോധ്യമായി.

        പുസ്തകത്തിലേക്ക് വന്നാൽ തെക്കേ അമേരിക്കയിലെ സ്വർണ്ണ ശേഖരം തേടി വരുന്ന സ്പാനിഷ് നാവികരുടെ കഥയാണ് ഇതിൽ പ്രതിപാദിച്ചിരിക്കുന്നത്. തെക്കേ അമേരിക്കയിൽ ധാരാളമായി കാണുന്ന മഞ്ഞലോഹം ചിലി ഉൾപ്പെടെയുള്ള ഭാഗങ്ങൾ ഭരിച്ചിരുന്ന, എന്നാൽ പുറംലോകവുമായി വലിയ ബന്ധമില്ലാതെ ഇരുന്ന ഇൻകാ വംശത്തിന് വലിയ വിലയില്ലാത്തതും എന്നാൽ യൂറോപ്പ് ഉൾപ്പെടെയുള്ള പുറം രാജ്യങ്ങളിൽ വളരെയധികം വിലയുള്ളതും, ചക്രവർത്തിമാർ ഉൾപ്പെടെയുള്ളവർക്ക് ആവശ്യമുള്ളതുമായ ഒന്നാണ്. മഞ്ഞലോഹം ലഭിക്കുന്ന കൃത്യമായ സ്ഥാനം അറിയാത്തതിനാൽ അതിനെത്തേടി പലകാലങ്ങളിലായി പല കപ്പിത്താന്മാരും, ഭാഗ്യാന്വേഷികളും പുറപ്പെട്ടിട്ടുണ്ടെങ്കിലും അങ്ങനെയുള്ള ഭൂരിഭാഗം യാത്രകളും നടുക്കടലിലോ ഒരു പച്ചപ്പുല്ലുപോലും കിളിർക്കാത്ത ദ്വീപുകളിലോ അവസാനിക്കാറാണ് പതിവ്. എന്നാൽ സ്വർണ്ണത്തോടുള്ള അമിതമായ ആർത്തി മൂലവും, അതു ലഭിച്ചാൽ ഉണ്ടാകുന്ന സ്ഥാനമാനങ്ങൾ മൂലവും വീണ്ടും വീണ്ടും ഇതുപോലെയുള്ള ഭാഗ്യാന്വേഷികൾ ഉണ്ടാകുന്നുണ്ട്. മുൻപ് കടന്നുപോയ നാവികർ ബാക്കിവെച്ച സൂചനകൾ ഇവരെ മുൻപ് വന്നവനേക്കാൾ ലക്ഷ്യത്തിലേക്ക് അടുപ്പിക്കുന്നു. അങ്ങനെ സ്പെയിനിൽ  നിന്നും പുറപ്പെട്ട പല പല സംഘങ്ങൾ കടന്നുപോകുന്ന പല രീതിയിലുള്ള   സംഘർഷങ്ങളാണ് പ്രസ്തുത നോവലിൽ പ്രതിപാദിച്ചിരിക്കുന്നത് 

     ഒരുതരത്തിൽ പറഞ്ഞാൽ തെക്കേ അമേരിക്കയിലേക്കുള്ള സ്പാനിഷ് അധിനിവേശത്തിന്റെ ആരംഭവും ഈ നോവലിലൂടെ പറഞ്ഞുവെക്കുന്നുണ്ട്. നിധിശേഖരം കൈപ്പിടിയിലാക്കുന്നതിനൊപ്പം ഇത്തരം ആൾക്കാർക്ക് അധികാര സ്ഥാനങ്ങളോടുള്ള മോഹവും കലശലാണ്. അതിനാൽ തന്നെ പലപ്പോഴും വളരെയധികം രക്തരൂക്ഷിതമായ പോരാട്ടങ്ങളിലാണ് ഇത്തരം മോഹങ്ങൾ ചെന്നെത്തുക. സ്പാനിഷ് അധിനിവേശം ചരിത്രത്തിൽ തന്നെ വളരെ ക്രൂരത നിറഞ്ഞ ഒന്നായിട്ടാണ് അടയാളപ്പെടുത്തിയിട്ടുള്ളത്.

        കഥാപരിസരം നൂറ്റാണ്ടുകൾ മുമ്പേയുള്ള  സ്പെയിൻ - തെക്കേ അമേരിക്ക ഭാഗങ്ങളായതിനാലും, അവയുടെ ചരിത്രം അധികം മനസ്സിലാക്കിയിട്ടില്ലാത്തതിനാലും തുടക്കത്തിൽ നോവലിന്റെ ഉള്ളാഴങ്ങളിലേക്കെത്താനായി കുറച്ച് താമസം പിടിച്ചെങ്കിലും എത്തിയതിനു ശേഷം ഭാഗ്യാന്വേഷികളുടെ കപ്പലിൽതന്നെയാണ് ഞാനും സഞ്ചരിച്ചത്. ഒരൊറ്റ പുസ്തകം കൊണ്ടു തന്നെ എനിക്ക് ഇഷ്ടപ്പെട്ട എഴുത്തുകാരുടെ കൂട്ടത്തിലേക്ക് കയറാൻ അരുൺ ആർഷയ്ക്ക് സാധിച്ചു. ദാമിയന്റെ അതിഥികളെ തീർച്ചയായും എല്ലാവരും പരിചയപ്പെടേണ്ടതുതന്നെയാണ്.