വായനക്കാരന്റെ നിരീക്ഷണം : വ്യാജ സഖ്യങ്ങൾ - മനു എസ് പിള്ള

     ദന്തസിംഹാസനത്തിനുശേഷം മനുവിന്റെ എഴുത്തിനെയും പ്രസന്ന കെ വർമ്മയുടെ വിവർത്തനത്തെയും എഴുത്തിനാസ്പദമായ വിഷയത്തെയും ഒരുപോലെ ഇഷ്ടപ്പെട്ട് വാങ്ങിയ  പുസ്തകമാണ് വ്യാജ സഖ്യങ്ങൾ.

   ഇന്ത്യ ബ്രിട്ടീഷുകാരുടെ കോളനിവാഴ്ചയിലായതിനുശേഷം അവരുമായുള്ള സഖ്യം എങ്ങനെയാകണം എന്നാലോചിച്ചു കുഴങ്ങുന്ന അന്നത്തെ നാട്ടു രാജാക്കന്മാരെക്കുറിച്ചാണ് ലേഖകൻ നമ്മോട് പറയാൻ ശ്രമിക്കുന്നത്. പ്രധാനമായും രാജാ രവിവർമ്മയുടെ കാലഘട്ടത്തിൽ ഇന്ത്യയിലെ നാട്ടുരാജ്യങ്ങൾ ഭരിച്ച രാജാക്കന്മാരുടെ ഭരണരീതിയും അവർ സ്വന്തം അധികാരം വിട്ടുപോകാതിരിക്കാനും എന്നാൽ ബ്രിട്ടീഷുകാരെ ശത്രുവാക്കാതിരിക്കാനും വേണ്ടി എന്തൊക്കെയാണ് ചെയ്തത് എന്നുമാണ് പുസ്തകത്തിൽ ഉള്ളത്.  നാട്ടുരാജ്യങ്ങളിലെ രാജാക്കന്മാരെ പറ്റി നാം ആദ്യം ഓർക്കുമ്പോൾ ഒന്നുകിൽ അവർ അധികാരത്തിന്റെ ഉത്തുംഗ ശൃംഗങ്ങളിൽ മഥിക്കുന്നവരോ അല്ലെങ്കിൽ നാടിനെ കാക്കുന്ന ഉത്തമ മാതൃകകളോ  ആയാണ് പൊതുവെ കണക്കാക്കുന്നത്. എന്നാൽ അവർ നേരിട്ട ആശയക്കുഴപ്പങ്ങൾ ചില്ലറയൊന്നുമല്ല. ഇതേ ആശയക്കുഴപ്പം ബ്രിട്ടീഷുകാരും നേരിട്ടിരുന്നു എന്നതാണ്  രസകരമായ മറ്റൊരു കാര്യം. ഇന്ത്യയിലെ ഓരോ നാട്ടുരാജ്യങ്ങളുടെയും ഭരണരീതിയും നാട്ടുകാരുടെ ജീവിതവും ഭാഷയും വിശ്വാസവും എല്ലാം ഓരോ രീതിയിലായിരുന്നതുകൊണ്ട് ഒരൊറ്റ നിയമം ഇന്ത്യയിൽ മൊത്തം അടിച്ചേൽപ്പിക്കുവാൻ ബ്രിട്ടീഷുകാർക്ക്  കഴിഞ്ഞിരുന്നില്ല. പല തരത്തിലുള്ള ഭരണകർത്താക്കളും അവയ്ക്കൊരു വിലങ്ങ് തടിയായിരുന്നു. 

   സ്വാതന്ത്ര്യാനന്തര ഇന്ത്യയെ വാർത്തെടുക്കുന്നതിൽ നാട്ടുരാജാക്കന്മാരും ചെറുതല്ലാത്ത പങ്കുവഹിച്ചിട്ടുണ്ട്. ലേഖകന്റെ തന്നെ ഭാഷയിൽ പറഞ്ഞാൽ ഈ രാജാക്കന്മാർ ജനനായകന്മാർ അല്ലാത്തതുകൊണ്ട് അവരുടെ നേട്ടങ്ങൾ നാം കാണാതെ പോകരുത്.  ദന്തസിംഹാസനത്തിൽ സേതുലക്ഷ്മിബായിയെയും അവരുടെ മുൻഗാമികളെയും പറ്റിയുള്ള വിവരങ്ങൾ ആയിരുന്നു ഉണ്ടായിരുന്നതെങ്കിൽ, ഈ പുസ്തകത്തിൽ ഒരു "പാൻ ഇന്ത്യൻ അപ്രോച്ച്" ആണ് ലേഖകൻ നടത്തിയിരിക്കുന്നത്. അതിനു പ്രധാനമായും കാരണമായത്  കിളിമാനൂരുകാരനായ രാജാരവിവർമയും.  അദ്ദേഹം ഓരോ നാട്ടുരാജ്യങ്ങളിലും പോയി വരയ്ക്കുന്ന ചിത്രങ്ങളുടെ വിശകലനത്തിലൂടെ അതത് ഭരണകർത്താവിന്റെ മനോനിലയെ പറ്റി വരെ പുസ്തകത്തിൽ വിശദീകരിച്ചിട്ടുണ്ട്. 

   "കിളിമാനൂരിലെ  കാക്കയ്ക്ക് പോലും കലയുണ്ട്" എന്ന് പഴഞ്ചൊല്ല് ആദ്യമായി കേൾക്കുന്നത് ഈ പുസ്തകത്തിൽ നിന്നാണ്. ഒരു കിളിമാനൂരുകാരൻ എന്ന നിലയ്ക്ക് രോമാഞ്ചം തോന്നുന്ന പല സന്ദർഭങ്ങളും പുസ്തകത്തിന്റെ തുടക്കത്തിൽ തന്നെയുണ്ട്.  മനുവിന്റെ അടുത്ത പുസ്തകം വാങ്ങുവാനുള്ള ഊർജവും ഈ പുസ്തകത്തിൽ നിന്ന് തന്നെ ലഭിച്ചിട്ടുമുണ്ട് .