വായനക്കാരന്റെ നിരീക്ഷണം: പൊനം - കെ എൻ പ്രശാന്ത്

 

 വായന ശീലമാക്കിയ വളരെയധികം സുഹൃത്തുക്കളുടെ ലിസ്റ്റിൽ കണ്ട പുസ്തകമായതുകൊണ്ടും, അതിന്റെ കവർ ഡിസൈൻ വളരെ ആകർഷിച്ചതു കൊണ്ടും  വായിച്ച പുസ്തകമാണ് കെ എൻ പ്രശാന്ത് എഴുതിയ "പൊനം"

   പൊനം എന്താണ് എന്നത് തന്നെയാണ് ആദ്യം മനസ്സിലാക്കേണ്ടിയിരുന്നത്. വയനാട്ടിലെ ഗോത്രവർഗ്ഗക്കാരുടെ  തനതു കൃഷി രീതിയാണ് പുനംകൃഷി. സംസാരഭാഷയിൽ അത് പൊനം ആയി മാറുന്നതാണ്. കാട് വെട്ടിതെളിച്ച് ചുട്ടെരിച്ച് കൃഷി ചെയ്യുന്ന രീതിയാണിത്.

   കർണാടകയോട് ചേർന്ന് കിടക്കുന്ന വയനാടൻ കാടുകളിലെ പകകളുടെയും പ്രതികാരങ്ങളുടെയും രതികളുടെയും കഥയാണ് പൊനം എന്ന നോവലിൽ. സ്വാതന്ത്ര്യസമരത്തിനു മുമ്പുള്ള  കാലഘട്ടം തൊട്ട് "ഗ്യാങ്സ് ഓഫ് വസേപുർ" എന്ന സിനിമയൊക്കെ ഇറങ്ങുന്നത്  വരെയുള്ള  കാലഘട്ടങ്ങളിലെ കരിമ്പുനം ഭരിച്ചതും, ഭരിച്ചവരുടെ  അടിമയായി ജീവിച്ചവരുമൊക്കെയാണ്  ഇതിലെ പ്രധാന കഥാപാത്രങ്ങൾ.

   കരിമ്പുനത്തെ ജീവിതങ്ങൾ സിനിമയാക്കാൻ വരുന്ന  ആഖ്യാതാവും അയാളുടെ സഹായിയായ കരിയനും കരിമ്പുനത്തെ ചോര മണമുള്ള കഥകൾ ചികഞ്ഞെടുക്കുകയാണ്. കഥയിൽ വരുന്ന എല്ലാ വ്യക്തികൾക്കും പറയാൻ ഒരു മുൻകാല കഥയുണ്ട് എന്നതാണ് പുസ്തകത്തിലെ ഏറ്റവും വലിയ പ്രത്യേകത. അതിൽ ഏതാണ്ട് എല്ലാ കഥകളും പകയും ചോരയൊഴുക്കുകളും രതിയും കൊണ്ട് സമ്പുഷ്ടമാണ്.  വർത്തമാനകാലത്തിൽ നിന്ന് നിമിഷനേരങ്ങൾ കൊണ്ട് ഭൂതകാലത്തേക്കും ഭാവികാലത്തേക്കും കഥാപാത്രങ്ങളോടൊപ്പം വായനക്കാരെയും കൊണ്ടുപോകാനുള്ള നോവലിസ്റ്റിന്റെ  കഴിവ് പ്രശംസനീയമാണ്. പ്രധാന കഥാപാത്രമായി വരുന്നത് കരിമ്പുനത്തെ കൊടുങ്കാട് തന്നെയാണ്. എവിടെനിന്നോ കരിമ്പുനത്തെ രൈരു നായരിലും പള്ളിക്കുഞ്ഞിയിലും എത്തിയ പക കൈമാറ്റം ചെയ്യപ്പെട്ട് ഒരു വശം കർത്തമ്പുവിലേക്കും മാധവനിലേക്കും ഗംഗനിലേക്കുമൊക്കെയും മറുവശം അമ്പൂട്ടിയിലേക്കും ശേഖര - ഗണേശനിലേക്കും എത്തപ്പെടുന്നു. ഇതിനിടയിലേക്ക് അറിയാതെ എത്തപെടുന്ന മാലിംഗൻ, കാന്ത, എസ് ഐ എബ്രഹാം ജോസ്  എന്നിവരും കരിമ്പുനത്തെ ചോരക്കളികളുടെ ഭാഗമാകുന്നു. അവിടുത്തെ കഥകൾ സിനിമയാക്കാൻ പോകുന്ന ആഖ്യാതാവും അവിടുത്തെ കഥകളുടെ തുടർച്ചകളിൽ എത്തിപ്പെടുന്നുണ്ട്. ഇരുവശങ്ങളിലും പ്രബല നേതാക്കൾ ഇല്ലാതാകുമ്പോൾ അവിടെ സമാധാനം പുലരുമെന്ന് വിചാരിക്കുമെങ്കിലും, ചിലപ്പോഴെങ്കിലും വിചാരിക്കാത്ത വഴികളിലൂടെ പക അടുത്ത തലമുറയിലേക്ക് കൈമാറുക തന്നെ ചെയ്യുന്നു. നോവൽ അവസാനിക്കുമ്പോഴും കരിമ്പുനത്തെ പ്രതികാരങ്ങളും, അതുമൂലം ഉണ്ടാകുന്ന അനിഷ്ട സംഭവങ്ങളും അവസാനിക്കുന്നില്ല.

 ആദ്യ നോവലാണ് എഴുതുന്നത് എന്ന് നോവലിന്റെ ഒരു ഭാഗത്തും മനസ്സിലാകാത്ത രീതിയിലാണ് നോവലിന്റെ ഘടനയും, കഥ പറയുന്ന രീതിയും, അതിലെ സംഭാഷണങ്ങളും. ഒറ്റ നോവൽ കൊണ്ട് തന്നെ എഴുത്തുകാരന് ലഭിച്ച പുരസ്കാരങ്ങൾ ഇതിന്റെ മേന്മ വ്യക്തമാക്കുന്നു.